Adela- Diktaturë mbi të dashurin, Bjordin

Ky është një muaj pushimi për Adelën dhe Bjordin. Fama e menjëhershme që dy të rinjtë morën nga “reality show” “Big Brother 2” i ka bërë ta shohin veten ndryshe. Pas disa udhëtimeve të njëpasnjëshme duke filluar nga Vlora, Durrësi, Italia e Hungaria kanë mbërritur sërish në Tiranë, në apartamentin me qera që ndodhet shumë pranë Ambasadës Amerikane,
ku jetojnë që pas daljes nga shtëpia. Aty është momenti i qetësimit dhe reflektimit të tyre, por edhe përballja me jetën normale si një çift në bashkëjetesë. Por cila është jeta që bëjnë, kanë zbritur me këmbë në tokë apo janë ende në delir, si sillet Adela me Bjordin, kush mbizotëron në lidhje, kush toleron. Tani që janë zhdukur nga sytë e publikut dhe janë përballur me jetën e tyre private, ata nuk mund ta fshehin lidhjen e
tyre të vërtetë, dhe marrëdhënien me median.

NJË ÇIFT ROMANTIK,
APO GRINDAVEC?!

Për një person publik komunikimi me median është ajo më delikatja. E njëjta gjë i ka ndodhur dhe Bjordit dhe Adelës, të cilët pasi dolën nga
shtëpia e famshme, u çuditën sesa shumë ishte shkruar për ta. Por pavarësisht koncepteve të tjera të Bjordit, i cili ka bërë një jetë krejt tjetër nga ajo e Adelës, sërish ajo dominon. Kështu vendimin nëse do pranojnë të dalin apo jo në një media, e merr ajo, pasi mesa duket nuk e sheh më median me interes sepse çfarë deshi e arriti. Por të gjithë fansat e tyre mbase do donin të dinin më shumë se ç’po ndodh me lidhjen e tyre
tani pasi nuk janë më në sytë të gjithëve, si sillen me njëri-tjetrin kush dominon, kush duron tjetrin, dhe për më tepër si prezantohen me median,
fansat dhe njerëzit e rastësishëm. Adelajda është ajo më dominantja në këtë lidhje, pikërisht ajo çfarë ra në sy edhe gjatë lojës brenda shtëpisë. Ndoshta është e befasuar nga fama, një lloj fame që siç e kanë pranuar të gjithë sa shpejt vjen, aq shpejt edhe ikën. E për ta ruajtur duhet të
kapësh momentin. Ajo gjithnjë në rolin e më të zgjuarës dhe nevrikes, i imponohet Bjordit ndoshta dhe pa dashur, edhe pse përpiqet ta
fshehë këtë fakt. Ndërsa Bjordi është ai që e dëgjon, dhe bën atë që ajo i thotë pothuaj për çdo vendim që duhet të marrin. Pikërisht ai tip që ajo
demonstronte dhe brenda shtëpisë kur reagonte me impulsivitet e shpesh bënte rolin e avokates për Bjordin, kur ai përfshihej në debate me banorët e tjerë, mesa duket vazhdon të jetë dhe tani. I pëlqen të lërë përshtypjen e vajzës së hidhët, duke treguar në njëfarë mënyre se ky është tipi i saj. Deri tani dihet që janë një çift që rrinë gjithë kohën
bashkë. Dhe duket qartë se deri tani fjalën e fundit e thotë Adela. Ndoshta kjo është një strategji që ajo ka bërë në kokën e saj për menaxhimin e vetes për t’u dukur interesante. Dhe natyrisht nuk janë ai çifti që vetëm duhen e përkëdhelen, por një çift që jo rrallë ngrejnë zërin.

ASGJE E RE NGA PLANI I
PROJEKTEVE

Kanë nënshkruar një kontratë me “Top Channel” dhe janë në pritje të shtatorit për t’i hyrë vërtet botës së televizionit. Sipas burimeve tona
thuhet se u janë premtuar shumë projekte nga ky televizion, dhe ata vazhdojnë të presin. Megjithatë ende nuk dihet se ku do përqëndrohen.
Deri tani nuk dihet nëse Adela do të jetë vërtet në krah të Adi Krastës me programin e “E diell”ashtu siç iu premtua nga vetë prezantuesi i njohur në transmetim direkt. Edhe pse po afron sezoni i ri i programeve televizive, ajo ende nuk ka bërë qoftë edhe një provë të vetme për të qenë gati për të drejtuar një spektakël me kohëzgjatje mbi pesë orë. Por gjithashtu ende nuk dihet nëse Adela vazhdon ta ketë në mendje pasionin për të realizuar një këngë dhe një klip. Nuk dihet pse nuk ka asnjë bashkëpunim me Pirro Çakon, ndërkohë që u fol edhe për bisedime me kompozitorë
të tjerë. Ajo që mbetet për momentin është të bëjë aktoren në serialin humoristik që po përgatit “Top Channel”, xhirimet e të cilit pritet të fillojnë në shtator. Në filmin, xhirimet e të cilit do të realizohen në ambientet e shtëpisë së famshme “Big Brother” ku ata kaluan plot 100 ditë, thuhet se ata do të luajnë vetveten. Drejtuesit e “Top Channel” kanë menduar të realizojnë këtë serial shumë komercial, nisur dhe nga popullariteti që ka fituar çifti i të dashuruarve. Dhe për Bjordin një rol në film është shumë mirë, pasi ai e ka pohuar që me hyrjen e tij në shtëpi se pasioni i tij kishte qenë kinemaja. Gjithsesi ata kanë nënshkruar një kontratë si staf i këtij televizioni, gjë që do u japë mundësinë që të përfshihen diku patjetër. Por
nisur dhe nga mungesa e eksperiencës me televizionin, çifti është në ankth dhe në pritje të zbatimit të projekteve të premtuara.

UDHËTIMET DHE
PUSHIMET ME MIKELEN

Mikele është shoku i ngushtë italian i Bjordit, i cili para pak ditësh ka mbërritur në Shqipëri për të kaluar pushimet me çiftin kryesisht në bregdetin e Vlorës. Dhe udhëtimet gjatë kësaj periudhe post “Big Brother” kanë qenë mënyra më e mirë për ta për t’u argëtuar. Udhëtimi më i gjatë ishte në Itali, ku Adela shkelte për herë të parë. Ditët e nxehta ata i ndanë mes Lecos dhe Romës, dhe vizitat në Koloseun, dhe Shën Pjetër. Pas kthimit andej ata udhëtuan drejt Orikumit, ku u akomoduan
në hotelin e Qetsorit, fituesit të “Big Brother 2”. Shumë fundjava ata i kalojnë në Durrës e Golem, ndërsa kanë pohuar mes miqsh se çdo moment të tyre e kanë fiksuar me aparat fotografik, dhe poza në udhëtime e plazh. Nuk dihet se kur do vendosin t’i publikojnë fotot e tyre në media, për t’iu dhënë kështu mundësinë fansave t’i shohin se si duken
me rroba banje.