Vera e lumtur e Adelës

Kryekrejt ndryshe nga ajo e një viti më parë, kur Adelajda ishte thjesht
një ndër të shumtat vajza të qytetit të Kavajës. Tani muajt e verës janë
vërtet të nxehtë. Me udhëtime pa fund, me një publik që kërkon të dijë
gjithçka për të, me parti politike që i shfrytëzojnë imazhin dhe me një
shtëpi në mes të kryeqytetit, ku ajo banon me të dashurin e saj, Bjordin.
Dhe me një kopertinë që e sheh protagoniste. E ç'do duhej më shumë për
të qenë një stinë thjesht e lumtur?

Ekzaktësisht një vit të shkuar, vera e saj nuk do të kishte asnjë
ndryshim nga ajo e shumë vajzave të tjera që jetojnë në një qytet të
vogël. Pasi kishte mbaruar viti shkollor dhe i kishte mbyllur hesapet
edhe me shkollën në një fshat, ku jepte mësim, dhe me atë ku studionte
(në Universitetin e Elbasanit për Gjuhë-Letërsi), se ç'mund të bënte
Adela në qytetin e saj të vogël të Kavajës nuk është fare e vështirë të
merret me mend. Ditë që rrjedhin njësoj, më së shumti brenda në shtëpi,
dhe kulmi i argëtimit: pushime me familjen në Sarandë. As kinema, as
koncerte, as pishina e as argëtim me shoqet.
Por ja që do të mjaftonin jo më shumë se 100 ditë dhe një format i
famshëm televiziv për të përmbysur gjithçka dhe për t'i servirur një
jetë të re, që Adela nuk kishte mundësi ta kishte, por që ama askush nuk
e ndalonte që ta pretendonte. Iu desh vetëm pak guxim (edhe pse ai guxim ia ktheu kundër të gjithë, në fillim edhe familjen) dhe shumë kokëfortësi për të plotësuar një formular, që do ta bënte shumë shpejt pjesë të spektaklit "Big Brother", nga i cili do të hynte askushi dhe do të
kthehej automatikisht në përsonazh të famshëm. E meqë synimi ishte të
ndryshonte jetën e saj provinciale, me të vënë këmbën në shtëpinë e
survejuar në çdo sekondë nga kamerat televizive, nuk kishte kohë për të
ndenjur urtë e as për të privuar veten nga ato kënaqësi që po i
servireshin me shumicë. Sigurisht, nuk ishte momenti as për t'i bërë
naze një dashurie që lindi aty e që do ta kthente brenda pak ditësh në
një fenomen të përfolur gjatë e kudo. Pak rëndësi ka nëse çmimi i
vendosur për fituesin nuk i ra asaj për pjesë, ama fitoi shumë më
tepër sesa një shumë të madhe parash: një jetë krejt të re, që ajo,
me gjithë ëndërrat e thurura në qytetin e saj të vogël, vështirë se e
kishte menduar se do t'i vinte e tillë. Ndaj edhe kjo verë që po jeton
nuk ka as edhe një gjë të përbashkët me verën e vitit të shkuar.
<Copied from "Jeta" magazine> Tani jeton në Tiranë, sëbashku me të dashurin e saj, Bjordin. Nuk është më mësuese e thjeshtë fshati, por një ndër personazhet më të lakmuara të momentin. Me vajzat e kryeqytetit nuk vlen krahasimi. Mund të bëjë shumë më shumë sesa bën një vajzë që jeton në metropol. E këtu nuk bëhet fjalë fare për kafe nga blloku, për fundjava në jug apo për jetë nate, të cilat tashmë janë bërë mëse të prekshme. Adela mund të ketë shumë më shumë se kaq. Është nga ato vajza që tërheq vëmendjen në çdo cep, jo vetëm të Tiranës, dhe këtu nuk është vetëm çështje bukurie, për hir të së cilës do të dallonte edhe sikur të ishte një vajz krejt e panjohur. Por ja që nuk është më aspak e tillë. Nëse do të ishte, nuk do të pushtonte faqet e para të suplementeve me thashetheme të fundjavës, nuk do të lakmohej nga gazetarët, nuk do të mblidhte rreth vetes fansa sa herë që del në rrugë dhe nuk do të angazhohej bashkë me Bjordin në fillim të verës në fushatën e zgjedhjeve, duke shoqëruar në çdo qytet stafin e partisë G99.

Revista Jeta